Mazir
26 окт 15:37korilim:122 Adebiet

Көк Туға – Құрмет!

Алмас Ахметбекұлы – өткен ғасырдың 80-жылдарында поэзия әлеміне араласқан, қазақ әдебиетінде өзіндік қолтаңбасы бар дара, әрі талантты ақын. Ойлы образға, шынайы сезімге толы сыршыл өлеңдерінің арқасында оның есімі сол 80-жылдардың өзінде-ақ Шыңжаң қазақтарына кеңінен танымал болды. Бұл ретте оның ертеректе жазған «Туған жерім – балалығым», «Сәуірдің бұлты», «Аптап», «Бозінген» секілді өлеңдерін атауға болады. Оның болмысы әсіресе осы «Бозінген» атты өлеңдегі түйе жануарының мінездемесі, ботасының боздауы, жапырық өркеші мен жабырқау жанары арқылы берген теңеулері мен образды ойлары адам бойындағы Ұлы далаға, Анаға, Отанға деген тіл жеткісіз тылсым сағынышты қозғайды. Міне, осы сағыныш оны туған жерге жетелейді. 

1993 жылы алғашқылардың бірі болып тарихи Отанына оралған сәтте, Тәуелсіз елінің шекарасында желбіреген Көк байрақ оны ерекше жігерлендіріп нәтижесінде, қаламынан асқақ патриоттық рухқа толы «Көк тудың желбірегені» атты өлең туды. Кейін, ақын әрі композитор Ермұрат Зейіпханұлы оған әуен жазды. Бүгінде бұл ән еліміздегі барлық салтанатты жиындарда, мереке-мейрамдарда, әскери бөлімдерде, оқу орындарында шырқалып жүр. Өр серпіген, биік азаматтық пафосқа толы бұл ән шетелдегі қазақтар арасында да кеңінен таралып, бір кезде еркінен тыс шекараның сыртында қалған, немесе амалсыздан шет жұрттарға кеткен ағайындардың Отанға, тәуелсіз елге деген сағынышын оятып, жүрегіне нұр құюда. Сол себептен, бұл туынды еліміз тәуелсіздігін алғаннан бері жарыққа шыққан патриоттық әндер мен өлеңдердің көшін бастап тұр десек қателеспейміз. 

ҚР Мәдениет қайраткері Алмас Ахметбекұлы Атамекенге оралғалы бері түрлі салада қолынан келгенінше ел игілігі үшін аянбай тер төккені баршаға аян. Жақында ғана «Жұмекеннен 100 өлең» атты Жұмекен поэзиясына жүйелі талдау жасаған тамаша еңбегі жарық көрген-ді. Бұл кітабында автор ауқымды әрі көркем ұлттық өлеңдерді талдай отырып, тіліміздің соншама бай құбылыс пен терең түйсіктерін түрлендірген Жұмекеннің орасан қуатты шабытын, өлең сөз қисынындағы қайталанбас тәсілдерін тарқата келе өзінің жұмекентанушыға айналып кеткендігін ақын туралы жазған 30 мақаласы арқылы айқындайды. Бұдан бұрын  ҚР Тәуелсіздігінің 25 жылдығына орай «Көк тудың желбірегені» атты кітабы да жарық көрген-ді. 

Еңбек еленді! Бүгін, Алмас Ахметбекұлын Тәуелсіз Қазақстанның даму жолына қосқан ерен еңбегі үшін «Құрмет» орденінің иегері атануымен шын жүректен құттықтай келе: Көк туымыз мәңгі желбіресін!, Еліміз аман, Жұртымыз тыныш болсын, шығармашылық шабытыңыз шарықтап, Армандап жеткен Отаныңызда отбасыңыздың ортасында бақытты ғұмыр кешіңіз дегіміз келеді! 

Басу
Пікір қосу
ЕСІМІҢІЗ:
E-Mail:
Код:
Кликните на изображение чтобы обновить код, если он неразборчив
Құпияны енгізіңіз: